Os vindeiros 27, 28 e 29 de outubro de 2022 celebraremos en Santiago de Compostela o XII Congreso Estatal de Escolas Oficiais de Idiomas, organizado pola Asociación de Profesorado de EOI de Galicia (APEOIGA), que aceptou a encomenda da man da Federación de Asociacións de Profesorado de EOI de España no anterior congreso de Málaga en marzo de 2019. Inicialmente previsto para marzo de 2021 e posposto por causa da pandemia pola COVID-19, este congreso permitiranos retomar o intercambio de coñecementos e experiencias do que viñamos desfrutando nas nosas reunións bianuais.

Se a linguaxe é o trazo diferencial do ser humano e Santiago de Compostela o símbolo do camiño, o camiño das linguas é o lema perfecto para unha reunión de ensinantes de lingua na nosa cidade. Lingua e camiño aluden a idénticos valores esenciais do ser humano como o entendemento, o progreso,  ou a diversidade; a vivencia nas escolas oficiais de idiomas, tanto para o alumnado como para o profesorado, é a de transitar pola vía que dá acceso á cultura, que dá a chave do diálogo, que permite avanzar no descubrimento e o crecemento persoal.

Para APEOIGA e a EOI de Santiago de Compostela hai, ademais, unha noción fundamental asociada a estes dous conceptos de camiño e lingua, que é a do encontro. Santiago de Compostela, Cidade Patrimonio da Humanidade e meta do Camiño de Santiago, é lugar de acollida e punto de encontro de culturas, de linguas e de visións do mundo. Por iso, no contexto deste bienio Xacobeo 2021-2022, un encontro de profesores de linguas tan diversas nesta cidade é unha celebración do feito de xuntarnos e de compartir, algo tan necesario nos tempos que estamos a vivir.

Animádemos, pois, a participar neste XII Congreso Estatal de EOI, ben como asistentes ou como poñentes, para podermos desfrutar das vosas aportacións e da vosa compañía.